नॅशनल फोरम/पुणे/दि/ प्रतिनिधी/
पुणे महापालिकेचे उपआयुक्त श्री. माधव जगताप यांनी अतिक्रमण व टॅक्स विभागात केलेल्या गलथान कारभारामुळे पुणे महापालिकेचे आर्थिक नुकसान होऊन जनमानसात पुणे महापालिकेची प्रतिमा मलिन केली म्हणून तत्कालिन आयुक्तांनी माधव जगताप यांची बदली करून दोन इन्क्रीमेंट स्टॉप करण्याची शिक्षा देण्यात आली होती. आता पुन्हा सहा महिन्यानंतर श्री. माधव जगताप यांच्याकडे आकाशचिन्ह विभागाचा पदभार देण्यात आलेला आहे. त्यांनी आकाशचिन्ह विभागात पाय ठेवता क्षणीच पहिल्याच महिन्यात व एकाच दिवसात, पुणे शहरातील सुमारे 2500 फ्लेक्स बॅनर्स, होर्डींग काढून टाकल्याच्या व जे अनाधिकृत बोर्ड बॅनर्स लावतील त्यांच्यावर गुन्हे दाखल करणे व दंडात्मक कारवाई करणर असल्याच्या बातम्या वृत्तपत्रांना देण्यात आली आहे. त्यानुसार काही वृत्तपत्रांसह काही न्यूज पोर्टलवर त्यांच्या ह्या बातम्या फोटोसहित प्रसारित करण्यात आलेल्या आहेत. तथापी ते जेंव्हा आकाशचिन्ह विभागाचे उपआयुक्त म्हणून कार्यरत होते, तेंव्हा एकाच बिबवेवाडी क्षेत्रिय कार्यालयात शेकडो बॅनर्स, होर्डींग लावण्यात आले होते. त्यांच्यावर कधी कारवाई केली नाही. दरम्यान बिबवेवाडी येथील एका बिल्डरने त्याच्या सुरक्षा भिंतीवर मागील पाच/सहा वर्षांपासून सुमारे 130 पेक्षा जास्त जाहीराती केल्या असता, त्याचा एक छदामही भरलेला नाही. नॅशनल फोरमच्या पाठपुराव्यानंतर बिबवेवाडीचे परवाना निरीक्षक श्री. थनवाल यांनी या जाहीरातदाराला सुमारे दोन कोटी रुपयांचे चलन देवून त्या बाबतची बातमी एका मोठ्या खपाच्या वृत्तपत्रात प्रकाशित केली होती. तथापी चलन देवून सुमारे दीड वर्षापेक्षा अधिक कालावधीत उलटून गेला तरी 2 दोन कोटी रुपये पुणे महापालिका तिजोरीत भरले नाहीत. सध्या संबधित जाहीरातदाराने त्या जाहीराती काढून टाकल्या असल्या तरी मागील पाच वर्षातील देय रक्कमा भरलेल्या नाहीत. त्यामुळे आकाशचिन्ह विभागाचे उपआयुक्त माधव जगताप हे जाहीरातदाराकडून दोन कोटी रुपये भरून पुणे महापालिका तिजोरीत भरणार आहेत की निव्वळ गुन्हे दाखल करण्याचा बहाणा करून श्री. थनवाल याला पाठीशी घालणार आहेत असा महत्वाचा प्रश्न निर्माण झाला आहे.
जाहीरातदराने थकित ठेवलेल्या रकमेचे नेमके काय प्रकरण आहे-
पुणे महापालिकेच्या बिबवेवाडी क्षेत्रिय कार्यालयाच्या हद्दीतील गंगाधाम चौकापासून सुरू होणारे सॉलिटेअर इमारती व एमटीएम मार्केटचे बांधकाम सुरू आहे. एकुण 22 एकर भुखंडावर सुमारे 2000 दुकानांचे/ शॉपिंग मॉलचे बांधकाम सुरू आहे. त्यांच्या संरक्षक भिंतीवर 20 बाय 30 आकाराचे सुमारे 45 होर्डींग बॅनर्स आहेत. तसेच 20 बाय 2 आकाराचे उभ्या साईजचे सुमारे 80 होर्डींग आहेत. सुमारे 45 + 80= 125 बॅनर्स मागील तीन वर्षांपासून ह्या जाहीराती दिसत आहेत. तथापी सॉलिटेअर एमटीएम बांधकाम व्यावसायिकाने जाहीरातीपोटी किती रक्कम भरली, त्याची काहीच माहिती बिबवेवाडी क्षेत्रिय कार्यालय यांच्याकडील रजिस्टरमध्ये उपलब्ध नाही. ते अधिकृत आहेत की अनाधिकृत याचीही माहिती दिली गेली नाही. दरम्यान त्यांचेवर मागील काही वर्षात कोणतीही कारवाई करण्यात आलेली नाही.
संबधित कंपनीने त्यांचे संरक्षक भिंतीवर ह्या जाहीरातींचे होर्डींग लावण्यात आलेल्या आहेत. तसेच या मार्केटमध्ये वेगवेगळ्या साहित्य व मार्केटचा तपशील देणाऱ्या उदा- सोने (गोल्ड) मार्केट, डायमंड मार्केट, कपडा मार्केट इ.इ. स्वरूपाच्या सुमारे 45 होर्डींगव्दारे जाहीराती केल्या जात आहेत. तसेच एमटीएम नमूद असलेले सुमारे 80 बॅनर्स/ होर्डींग आहेत. सुमारे 125 पेक्षा अधिक जाहीराती केलेल्या असतांना, त्याबाबतची परवानगी घेतली नसल्याची बाब माहितीचे अधिकार- 2005 चे संदर्भानुसार दिसून येत आहे.
गंगाधाम चौक ते वरचा कोंढव्याकडे जाणाऱ्या रस्त्यावर सुरू असलेल्या बांधकामाच्या जागा वापराचे ठिकाणी ह्या जाहीराती केलेल्या आहेत. तथापी त्याची कुठल्याही प्रकारची परवानगी घेतली नसल्याने पुणे महानगरपालिकेचे कोट्यवधी रुपयांचे आर्थिक नुकसान झाले आहे. तसेच ते नुकसान आजही होत आहे. याबाबत माहिती अधिकार कार्यकर्ते श्री. श्रीनाथ चव्हाण यांनी सातत्याने पाठपुरावा केल्यानंतर देखील कारवाईची कोणत्याही प्रकारच्या हालचाली झाल्या नाहीत. याबाबत पुणे महापालिकेचे सहायक महापालिका आयुक्त श्री. आव्हाड यांची भेट घेवून बिबवेवाडी क्षेत्रिय कार्यालयाच्या हद्दीतील अनाधिकृत व बेकायदेशिर होर्डींगची माहिती दिली. दरम्यान महापालिका सहायक आयुक्त श्री. प्रदीप आव्हाड यांनी आकाशचिन्ह विभागाचे परवाना निरीक्षक श्री. विजय थनवाल यांना तातडीने कारवाई करण्याचे आदेश दिले. तथापी थनवाल हे कारवाई करण्यास पुढे येत नव्हते. कदाचित त्यांच्यावर आकाशचिन्ह विभागाचे उपआयुक्त श्री. माधव जगताप यांचा दबाव असल्याचे दिसून येत होते. माधव जगताप यांच्या दबावामुळेच अनेक होर्डींगधारकांवर कारवाई होत नाही असेही दिसून आले आहे.
श्री. विजय थनवाल व सॉलिटेअर यांनी मुंबई प्रांतिक महानगरपालिका (जाहीरात व फलक नियंत्रण) नियम 2003 मधील तरतुदींचा भंग केला आहे. याच कायदयातील तरतुदीनुसार आयुक्तांच्या लेखी परवानगीशिवाय कोणतेही अभिकरण, जाहीरात लावणार नाही. तसेच परिच्छेद 5 नुसार अनाधिकृत जाहीरात फलक, इत्यादी काढुन टाकणे किंवा पाडुन टाकणे याबाबत तरतुदी आहेत. या सर्व तरतुदींचा भंग जाहीरातदार संस्था यांनी केला आहे. तसेच पुणे महापालिकेच्या बिबवेवाडी क्षेत्रिय कार्यालयाचे परवाना निरीक्षक श्री. विजय थन्वाल यांनी त्यांना दरमहा मिळत असलेल्या पारितोषण, यामुळे त्यांनी महापालिका अधिनियमातील तरतुदींची अंमलबजावणी केली नाही. त्यामुळे मागील दोन/तीन वर्षात पुणे महापालिकेचे कोट्यवधी रुपयांचे आर्थिक नुकसान केले असल्याबाबत देखील पुणे महापालिका आयुक्त कार्यालयास कळविले होते. 
माधव जगतापांचा पदभार काढुन घेतल्यानंतर नोटीसांचा धडाका –
दरम्यान पुणे महापालिकेच्या अतिक्रमण व आकाशचिन्ह विभागावर मागील सात/आठ वर्षांपासून कार्यरत असलेले उपआयुक्त माधव जगताप यांच्याकडून दोन्ही पदांचा पदभार काढुन घेण्यात आलेला होता. त्यामुळे स्वतःची वसुली बाहेर येवू नये किंवा माधव जगतापांचे नाव बाहेर येवू नये म्हणून सॉलिटेअरवर कारवाईचा बडगा उगारला असल्याची त्या काळात चर्चा होती.
दरम्यान माहिती अधिकार कार्यकर्ते श्री. श्रीनाथ चव्हाण यांनी, माहिती अधिकारात माहिती घेतली असता, माहे 31 मार्च 2023 रोजीपर्यंतचे चलन सॉलिटेअर एमटीएम यांनी घेवून गेले होते. तथापी आज ऑगस्ट 2024 पर्यंत व पुढे आज 15 ऑक्टोंबर 2025 रोजी पर्यंत होर्डींगची रक्कम भरलेली नव्हती. वर्षानुवर्ष होर्डींगची रक्कम भरली नाही तरी कारवाई केली जात नव्हती. दरम्यान कायदयातील तरतुदीनुसार, होर्डींगची रक्कम भरली नसल्यास कारवाई करण्याचे अधिकार पुणे महापालिकेकडे असतांना, केवळ आर्थिक हितसंबंध जपण्यासाठी आजही मोठ मोठ्या होर्डींग धारकांवर कारवाई केली जात नसल्याचे दिसून येत आहे. दोन कोटी रुपये महसुल भरण्याची नोटीस –
बिबवेवाडी क्षेत्रिय कार्यालयातील आकाशचिन्ह विभागातील भ्रष्ट सेवक श्री. विजय थनवाल यांनी स्वतःवरील कारवाईच्या भीतीने सॉलिटेअर या बांधकाम कंपनीस नोटीस बजावली असल्याचे समोर आले आहे. तसेच तातडीने पुणे महापालिकेचा महसुल भरण्यात यावा व त्याची प्रत बिबवेवाडी क्षेत्रिय कार्यालयाकडे जमा करण्याचे आदेश देण्यात आले आहेत. तथापी दोन कोटी रुपयांचे चलन 31 मार्च 2023 रोजी देवून आज 15 ऑक्टोंबर 2025 उजाडला तरी दोन कोटी रुपयांची थकित रक्कम भरलेली नाहीये. आता माधव जगताप पुणे महापालिकेची दोन कोटी रुपयांची थकित रकम भरून घेणार की थेट कारवाई करणार याकडेच सर्वांचे लक्ष लागलेले आहे.
माधव जगताप व अधिकृत व अनाधिकृत होर्डींगधारकांचे मागील अनेक वर्षांपासूनचे सख्ये आहेत, हे सर्वांनाच माहिती आहे. आता सहा/आठ महिन्यानंतर पुन्हा आकाशचिन्ह विभागाचा पदभार स्वीकारल्यानंतर एकाच दिवसात 2500 ( दोन हजार पाचशे) बॅनर्स होर्डींगवर कारवाई केल्याची बातमी दिली खरी... परंतु ज्या ज्या क्षेत्रिय कार्यालयात परवानाधारक होर्डींग धारकांच्या थकित रकमेच्या वसूलीबाबत कोणती भूमिका घेणार आहेत हा कळीचा मुद्दा आहे. 15 क्षेत्रिय कार्यालयात विजय थनवाल सारखे आणखीही भ्रष्टाचारी व पुणे महापालिकेचे आर्थिक नुकसान करणारे सेवक अनेक आहेत. विजय थनवाल जिथे जाईल तिथे अशाच प्रकारचा कारभार केला आहे. केवळ बदली करून ही समस्या सुटणार नाहीत, तर थनवाल व थनवाल सराख्यांवर जो पर्यंत फौजदारी कारवाई होवून त्यांना पुणे महापालिका सेवेतून बडतर्फ करीत नाहीत, तो पर्यंत आकाशचिन्ह विभागाचा कारभार सुधारणार नाही हेच खरे.